Kuri uyu wa 11 Gicurasi 2014, nibwo imikino ibanziriza uwa nyuma usoza shampiyona ya Espagne yakinwe, aho kugeza ubu hataraboneka izegukana igikombe cya Shampiyona nubwo Atletico Madrid ihabwa amahirwe menshi kurusha Barcelone zisa n’aho zihanganye ku gikombe,nyuma yo gutsindwa kwa Real Madrid ikongera gutakaza amanota.

 

Atletico Madrid zigomba

Barcelona na Atletico Madrid zigomba kwisobanura kuwa 17 Gicurasi hakavamo imwe yegukana igikombe cya Shampiyona ya Espagne

 

Mu mikino yahuje amakipe yahabwaga amahirwe yo kuzatwara igikombe cya Shampiyona muri Espagne, amwe muri yo yatunguwe.

Ikipe ya Atletico Madrid ya mbere kugeza ubu, ari nayo ihabwa amahirwe menshi yo kwegukana igikombe cya shampiyona, yanganije na Malaga ya 13 ku rutonde igitego 1-1.

Kunganya kandi kwabaye ku ikipe ya FC Barcelone yatunguwe na Elche ya 14 ku rutonde, binganya ubusa ku busa.

Ikipe ya Real Madrid niyo yatunguwe kurusha izindi, aho yatsinzwe ibitego 2-0 na Celta Vigo yari yayakiriye,yo  iri ku myanya wa 8 kugeza ubu muri shampiyona ya Espagne.

Kuri ubu hakaba hategerejwe cyane ikipe izatwara igikombe hagati ya FC Barcelone na Atletico Madrid. Barcelone ikaba yatwara iki gikombe mu gihe yaba itsinze Atletico Madrid,ariko nanone Atletico Madrid ikaba yahita icyegukana iramutse inganije cyangwa se igatsinda umukino wa nyuma izaba yakiriwemo na Barcelone.

Kuri ubu mu gihe hasigaye umukino umwe gusa,ikipe ya Atletico Madrid ikaba iri ku mwanya wa mbere n’amanota 89, Barcelone ikayikurikira n’amanota 86,naho Real Madrid ikaba iza ku mwanya wa gatatu n’amanota 84.

Aya makipe uko ari 3 akaba anafite bidasubirwaho itike yo kuzakina champion’s league ku mugabane w’I Burayi umwaka utaha wa 2014-2015.

Amakipe nka Real Betis iri ku mwanya wa nyuma, akaba yaramaze kumanuka mu cyiciro cya kabiri,hakaba hategerejwe n’andi abiri agomba kuyikurikira hagati ya Real Valladolid iherutse kunganya na Real Madrid, Osasuna,Granada na Almeria kugeza ubu zisa n’izisatirana mu manota ku buryo ishobora kuzamanuka.

Umukino uzahuza ikipe ya FC Barcelone na Atletico Madrid uzaba kuwa 17 Gicurasi 2014 I Camp Nou,ukaba unafatwa nk’umukino uzagaragaza izahita yegukana igikombe cya Shampiyona.

 

Share Button