Urutonde rwashyizwe ahagaragara na Televisiyo nyamerika ikora cyane ibijyanye n’imikino “Entertainment Sport Programming Network Incorporated” cyangwa benshi bazi kuri ESPN inc rwagaragaje amakipe “clubs” akomeye cyane ku mugabane w’I Burayi,ugereranije n’andi.

 Top ten ku makipe akomeye I Burayi

Ikipe ya Bayern Munich ku myanya wa mbere mu makipe y’I Burayi akomeye

 Urutonde rwasohotse kuwa 5/12/2013, rwerekana ko mu mwaka wa 2013-2014, ikipe ya Bayern Munich igaragara nk’ikipe ya mbere ku mugabane w’I Burayi. Uyu mwanya iyi kipe ikaba yarawuhawe bitewe n’ibigwi byayo,aho yegukanye ibikombe bitandukanye birimo  icya Champions league,icya Shampiyona y’iwabo,na bimwe mu bindi bikombe bitandukanye byakiniwe ku mugabane w’I Burayi umwaka ushize.

Ikindi cyatumye iyi kipe yarashyizwe ku mwanya wa mbere I Burayi,harimo uburyo ubu yitwara muri shampiyona iwabo mu Budage,aho iri ku mwanya wa mbere inarusha Borussia Dortmund ya 3, amanota 10. Ikindi cyarebwe n’uburyo irimo kwitwara muri Champions league uyu mwaka ,aho kugeza ubu yamaze kubona itike ya 1/8 rugikubita kandi itanatsinzwe na rimwe.

Usanga kandi abakinnyi bayo bamenyeranye kandi basimburana neza ku myanya nta cyuho ngo hari uwabuze.

Ikipe ya 2 ESPN igaragaza ni Real Madrid,hagendewe cyane ku buryo iyi kipe nayo yagiye yitwara ndetse n’uburyo umukinyi wayo Christiano Ronaldo yitwara afatanije na bagenzi be. Iyi kipe kandi nayo ikaba ikomeye cyane ku buryo bigoranye kuba yatsindwa bitewe n’ubufatanye buba mu bakinnyi bayo. Iyi kipe kandi muri rusange ikaba yitwaye neza muri shampiyona.

 arsenal team

Arsenal ku mwanya wa 4 ku rutonde  bitewe n’imyitwarire imazi igihe igaragaza

Izindi kipe bagiye bavuga bagendeye ku myitwarire yazo,harimo ikipe ya Juventus iyoboye shampiyona iwabo,ikaba iza ku mwanya wa 3 ku rutonde ESPN yashyize ahagaragara. Ikipe ya 4 ni Arsenal,hagendewe ku mwitwarire myiza irimo kugaragaza muri uyu mwaka haba muri shampiyona na Champions league.

Naho ikipe ya gatanu n’ikipe ya Paris Saint Germain ibica bigacika muri iyi minsi mu Bufaransa. Ikurikirwa ku mwanya wa 6 n’ikipe ya Atletico Madrid yo muri Espagne,yitwara neza muri Shampiyona iwabo,ikaba iri ku mwanya wa kabiri ikurikira FC Barcelone. Iyi kipe ikaba irimo kwitwara neza bigaragara muri Champions league uyu mwaka.

Ikipe ya 7 ni FC Barcelone,ikaba iri kuri uyu mwanya inengwa cyane ko iyo ibuze Lionel Messi,kizigenza wayo,ihita icika intege cyane,ikagaragaramo guhuzagurika ndetse n’andi makipe akayitinyuka byoroshye. Hagenderwa cyane ku buryo yatsinzwe na Ajax yo mu Buholande muri champions League ikanatsindwa na Atletico Bilbao muri shampiyona.

Ikipe ya Manchester City iza ku mwanya wa 8,aho nayo bivugwa ko ifite abakinnyi bakomeye ariko usanga ahanini bataramenyerana kandi mu kibuga utapfa guhita wizera ko bari butsinde nk’uko wabyizera ku makipe nka Bayern Munich cyangwa Real Madrid.

Ikipe ya 9 ni Borussia Dortmund yasubiye inyuma cyane ugereranije n’uko yari imeze umwaka ushize. Iyo iri zina rivuzwe benshi bayibuka yihaniza Real Madrid muri champions league umwaka ushize.aho yagaragariye ko ikomeye ndetse ikagera ku mukino wa nyuma.

Ibi bigwi byayo ariko bikaba bigenda bikemangwa,bitewe n’uburyo iri kwitwara nabi haba muri Shampiyona no muri champions league. Benshi bakaba basanga nitisubiraho izaba nk’izindi zose. Ikipe ya 10 ni Lille yo mu Bufaransa,hagendewe ku buryo yitwaye muri shampiyona iwabo.

Gusa kuri uru rutonde ntihagaragaraho amakipe nka za Chelsea, za Liverpool, Manchester United, n’izindi. Ubwo abasesengura n’abakunda iby’umupira w’amaguru bakwibaza impamvu ndetse n’imyitwarure y’aya makipe.

Share Button