Uretse umukino wo muri Capital One cup ikipe ya Arsenal yatsinzwemo na Chelsea  rugikubita 2-0 kuwa 29 Ukwakira 2013, ikaba ivuye muri iryo rushanwa n’uwo yatsinzwemo na Dortmund ku kibuga cyayo muri champions league,nta wundi mukino n’umwe yaba uwa shampiyona cyangwa Champions league,iyi kipe yongeye gutsindwa.

Iyi kipe ikaba yarihereranye amakipe akomeye azwi ku mugabane w’I Burayi nka Napoli,Borussia Dortmund,Liverpool n’andi irayatsinda mu marushanwa byahuriyemo.

Uyu muvuduko wo kumara igihe idatsindwa,ukaba wahagaritswe n’ikipe ya Manchester United ku kibuga cyayo Old Trafford,ihatsindira ikipe ya Arsenal kuri uyu mugoroba 1-0. Iki gitego rukumbi kikaba cyatsinzwe n’umukinnyi Robin Van Persie w’umuholande,umukinnyi ikipe ya Manchester yaguze na Arsenal.

Gutsindwa kwa Arsenal kuri uyu mugoroba wo kuwa 10 Ugushyingo 2013, byacecekesheje abafana benshi b’iyi kipe,bari bamaze kuyibonamo nk’umwami wa Ruhago mu Bwongereza muri iyi saison.

Mu yindi mikino,ikipe ya Sunderland yatsinze Manchester City 1-0, Newcastle itsinda Tottenham 1-0, Stoke City inganya na Swansea City 3-0. Kuwa 9 Ugushyingo ikipe ya Liverpool yari yatsinze Fulham 4-0, Chelsea bigoranye inganya na West Bromwich Albion 2-2.

Kugeza ubu umukinnyi w’umwataka wa Manchester City Sergio Aguero ,Daniel Sturridge na Luis Suarez ba Liverpool bakaba bari imbere mu bamaze gutsinda ibitego  byinshi muri Premier League aho bafite ibitego 8. Bakurikiwe na Robin Van Persie wa Manchester United  na Loic Remy New Castle bafite 7.

Ikipe ya Arsenal ni iya mbere n’amanota 25,Liverpool ni iya 2 n’amanota 23, Southmpton ni iya 3 n’amanota 22,Chelsea iya 4 n’amanota 21,Manchester United ni iya 5 n’amanota 20 inganya na Tottenham na Everton.

 Manchester United yahagaritse umuvuduko wa Arsenal, Manchester City iratungurwa naho Barcelone ikomeza umuhigo wo kudatsindwa

Barcelone ikomeje kwesa umuhigo wo kudatsindwa muri shampiyona

Muri Esipanye,ikipe ya Barcelona ikomeje kuyobora urutonde n’amanota 37 nyuma yo gutsinda Real Betis 4-1. Ikipe ya Atletico Madrid n’iya 2 nyuma yo kunganya ikaba ifite 34, naho  Real Madrid ikaba ari iya 3 na 31. Barcelona ikaba itaratsindwa umukino n’umwe iwabo.

Share Button