Burera: Bizihije umunsi mpuzamahanga w’umukozi bakina umupiraAbakozi bakora muri mine ya New Bugarama Mining iherereye mu murenge wa Kagogo, mu karere ka Burera bakinnye umupira amaguru mu rwego rwo kwizihiza umunsi mpuzamahanga w’abakozi ndetse no gusabana dore ko bari bamaze gihe kirekire badakina.

Uwo mukino wabaye tariki ya 01/05/2013, wahuje amakipe abiri, Foyer na Inférieur, y’abakozi bo muri New Bugarama Mining. Warangiye ikipe ya Inférieur itsinze ibitego 3 kuri 2 bya Foyer.

Uwarebaga uwo mukino yabonaga ko abo bakinnyi batamenyereye gukina umupira w’amaguru kuko akazi bakora, ko gucukura amabuye y’agaciro, katatuma babona umwanya wo kwitoza gukina umupira w’amaguru.

Bamwe mu bakinnyi bari bari mu kibuga nta nkweto bari bambaye, kuburyo batezaga umupira ibirenge byambaye ubusa. Gusa ariko ibyo ntibyabacaga intege kandi wabonaga nta kibazo bafite mu mikinire yabo kuko bakinaga uko babyumva.

Ikindi ni uko uwo mukino wagaragaye mo amashoti menshi, nta guhanahana kw’abakinnyi mu kibuga kwagaragaraga.

Igice cya mbere cy’umukino abakinnyi b’ikipe ya Foyer nibo bari bihariye umupira. Ibyo byaje gutuma muri icyo gice hagati, iyo kipe ibona igitego cya mbere. Icyo gice cy’umukino cyarangiye ari igitego 1 cya Foyer ku busa bwa Inférieur.

Igice cya kabiri kigitangira ikipe ya Inférieur yishyuye igitego yari yatsinzwe. Mu kibuga ibintu byahise bihunduka maze ikipe ya Foyer ibona igitego cya babiri. Byabaye nko gukoza agati mu ntozi kuko ikipe ya Inférieur yahise ikishyura ndetse umukino wenda kurangira ibona igitego cya gatatu maze umukino urangira utyo.

Umukino urangiye abafana b’amakipe yombi bagiye mu kibuga maze barabyina. Gusa ariko ab’ikipe ya Inférieur nibo bagaragazaga ibyishimo byinshi.

Kubera ko uwo mukino wahuje abakozi ba New Bugarama Mining wari uw’ubusabane byatumye abafana ndetse n’abandi bakozi, ubwo batahaga umukino urangiye, buzura umuhanda babyina.

New Bugarama Mining ikoresha abakozi bagera ku 1500. Muri iyo mine hacukurwa amabuye y’agaciro yitwa Wolfram. Ikiro kimwe cy’ayo mabuye y’agaciro kigura amafaranga y’u Rwanda 4200.

 

Share Button