Ibibuga biracyari bike mu karere ka Nyabihu,nacyo kikaba ari kimwe bibazo bituma imikino n’imyidagaduro biba ku rwego rutari hejuru

Ibibuga biracyari bike mu karere ka Nyabihu,nacyo kikaba ari kimwe bibazo bituma imikino n’imyidagaduro biba ku rwego rutari hejuru

Akarere ka Nyabihu ni kamwe mu turere tugize Intara y’I Burengerazuba. Kagizwe n’imirenge 12 n’utugari 73 n’imidugudu 473.

Aka karere kagizwe n’ibice by’imisozi miremire ihanamye ndetse n’ibice by’amakoro. Gafite ubuso bugera kuri km2 535.

Aka karere ni kamwe mu turere dufite ibibuga by’imikino n’imyidagaduro bike ugereranije n’uturere bituranye nka Musanze na Rubavu,usanga dufite amasitade aberaho imikino,ibibuga by’imikino itandukanye n’ibindi bijyanye n’imikino n’imyidagaduro. Utu turere kandi usanga dufite amakipe atandukanye  ari mu cyiciro cya mbere cy’umupira w’amaguru mu Rwanda nka Musanze F.C I Musanze na F.C Marine ndetse na Etincelle I Rubavu.

Nk’uko twabitangarijwe n’ushinzwe urubyiruko, umuco na Sport mu karere ka Nyabihu,uretse ibibuga bibiri gusa by’umukino w’umupira w’amaguru,igiherereye I Rambura n’icyo mu Bigogwe, nta bindi bibuga byujuje ibisabwa mu mupira w’amaguru bihaboneka. Uretse n’ibibuga,aka karere nta kipe yihariye yako izwi gafite yagaserukira mu ruhando rw’utundi turere kuko yasenyutse bitewe n’ikibazo cy’amikoro nk’uko Murwanashyaka Bosco yabidutangarije.

Ibyo kandi bikajyana n’ibindi bibuga by’indi mikino itandukanye. Uretse gusa ibiboneka ku nzu y’urubyiruko ya Karago, ibindi usanga biboneka mu bigo by’amashuri ku buryo bitorohera urubyiruko rusanzwe kubona ibibuga bihagije byo gukiniraho no gukora indi myidagaduro nk’uko umwe mu rubyiruko twaganiriye,utuye mu murenge wa Mukamira mu kagari ka Rubaya yabidutangarije.

Ikibazo cy’ibibuga bidahagije giterwa n’impamvu nyinshi

Imiterere y’akarere ka Nyabihu ubwayo y’imisozi ihanamye,ituma ibibuga bimwe na bimwe bitabona aho byakubakwa nk’uko Murwanashyaka Jean Bosco abivuga. Gusa uretse iki kibazo cy’imiterere y’aka karere,ngo hari n’ikibazo cy’amikoro adahagije nayo akaba ari indi mbogamizi.

Ku kibazo cy’imikino n’imyidagaduro, Murwanshyaka avuga ko ku rwego rw’akarere n’imirenge abayobozi bacyumva,uretse ikibazo cy’amikoro gusa gihari. Kugeza ubu ngo harateganywa gukorwa ibishoboka byose ku buryo hazakorwa ubukangurambaga mu mirenge,bakegeranya abakinnyi basanzwe bahaboneka ku buryo buri murenge wagira ikipe yawo ndetse n’akarere  mu mwaka utaha kazateganya amafaranga  mu ngengo y’imari yako yo gufasha igikorwa ku buryo nako kakongera kugira ikipe yako.

 

 

 

 

 

Share Button