Kuri icyi cyumweru tariki ya 2/9/2012, hazaba isiganwa ry’amagare ryateguwe n’ishyirahamwe ry’umukino w’amagare mu Rwanda (FERWACY), mu rwego rwo kongerera abakinnyi b’u Rwanda amarushanwa.

Muri iri rushanwa rizitabirwa n’amakipe yose agize ishyirahamwe ry’umukino w’amagare mu Rwanda,mu bagabo no mu bagore, abasiganwa bazahaguruka i Kigali, berekeze i Rwamagana bongere bagaruke i Kigali.

Nk’uko tubikesha ubuyobozi bwa FERWACY, mu cyiciro cy’abagabo abazasiganwa bazahagurukira i Nyandungu mu mugi wa Kigali saa tatu za mu gitondo berekeza i Rwamagana. Nibahagereza bazahita bagaruka i Kigali aho bazasoreza i Remera kuri Stade Amahoro.

Mu cyiciro cy’abagore,  abasiganwa bazahagurukira i Rwamagana berekeza i Kigali bakazasoreza nabo i Remera kuri Stade Amahoro.

Iri siganwa ngo rifasha cyane abakinnyi gukomeza kwitoza ntibasubire inyuma kuko baba bitegura kujya mu masiganwa mpuzamahanga aba abategereje.

Ku musozo w’iri siganwa, abakinnyi 12 ba mbere mu bagabo bazahaembwa, naho mu bagore hazahembwe batanu ba mbere. Hazahembwa kandi abakinnyi bazaba babashije kwigaragaza mu bice bitandukanye nko gusiga abandi ahazamuka, umukinnyi witwaye neza akiri muto, n’ibindi.

 

Theoneste Nisingizwe

Share Button