Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Mu marushanwa yateguwe ku bufatanye hagati y’ishami ry’umuryango w’abibumbye ryita ku baturage (UNFPA) n’inama y’igihugu y’urubyiruko yashojwe kuri uyu wa 12/07/2012, ubwo hizihizizwaga umunsi ngarukamwaka wahariwe kwita ku baturage mu karere ka Nyamasheke, umurenge wa Kagano watwaye igikombe nyuma yo gutsinda ibitego bitatu ku busa bw’umurenge wa Kanjongo.

Aya marushanwa yateguwe muri gahunda yo kwigisha urubyiruko ku buzima bw’imyororokere, kurwanya inda zitateguwe, kwitabira gahunda zo gupimisha inda mu gihe batwite, kurwanya sida, guhangana n’ihohoterwa rishingiye ku gitsina n’ibindi bigamije imibereho myiza yarwo.

Iyi mikino y’umupira w’amaguru n’andi marushanwa arimo imivugo, indirimbo n’udukinamico duto yateguwe mu rwego rwo kwegeranya urubyiruko muri buri mpera z’icyumweru ikabera ahantu hamwe muri buri murenge, maze ibigo nderabuzima bikaboneraho gutanga ubutumwa bugamije guhindura imyumvire y’urubyiruko ku buzima bw’imyororokere.

Uretse umurenge wa Kagano watwaye igikombe kigizwe n’umupira w’amaguru ndetse n’imyenda yo gukinana n’umurenge wa Kanjongo wabaye uwa kabiri ugahabwa umupira wo gukina, hahembwe umuntu umwe wabaye uwa mbere mu mivugo, umwe mu ndirimbo n’undi wabaye uwa mbere mu ikinamico.

Mu rwego rwo gukomeza guhuriza hamwe urubyiruko kandi, imirenge yose yahawe imipira yo gukina, umwe kuri buri mukino bitewe n’ibibuga ifite.