Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Ikipe y’Amagaju isanzwe iterwa inkunga n’akarere ka Nyamagabe yamaze kongererwa amafaranga yari isanzwe ihabwa n’akarere kugira ngo izabashe kuza mu myanya muri shampiyona itaha.

Kuva mu mwaka wa 2008 ubwo yazamukaga mu  cyiciro cya mbere cya shampiyona, ikipe y’Amagaju ntirabasha kwitwara neza ngo ize mu myanya ya hafi. Buri ghihe Amagaju akunze kurangiza shampiyona mu makipe ane ya  nyuma.

Gusa kugeza ubu ngo akarere karifuza ko iyi kipe yaza mu myanya y’imbere ikaba ari nayo mpamvu akarere kongereye mafaranga kazajya gaha iyi kipe aho kayiteganyirije miliyoni 50 z’amanyarwanda mu ngengo y’imari y’uyu mwaka.

Nshimiyimana Jean Pierre, visi peresida w’Amagaju yatangaje ko bashaka ikipe itsinda, ati “ intego twari twihaye mu minsi yashize kwari ukuguma mu cyiciro cya mbere ariko ubu twarabirenze turashaka gukora ikipe ikomeye, itsinda, ijya mu myanya myiza.”

Nshimiyinama yavuze kandi ko iyi kipe yatangiye gutegura shampiyona ishaka abakinnyi ndetse n’abaterankunga.

Iyi kipe kandi ikaba ifite inama y’inteko rusange kuri uyu wa gatandatu tariki ya 14/7/2012 aho abanyamuryango bazatora indi komite igomba kuyobora iyi kipe mu myaka ibiri iri mbere. Kugeza ubu, Munyantwari Alphonse, guverineri w’Intara y’Amajyepfo niwe wari perezida w’Amagaju.