Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Abana nabo bagaragaje ibyo bigishijwe

umuryango Right To Play wita ku burezi bw’umwana binyuze muri siporo watanze inyemezabumenyi (Certificate) ku batoza 61 bo mu Karere ka Bugesera Intara y’Iburasirazuba,  nyuma yo kuba barashyize mu bikorwa ibyo bahuguriwe bijyanye no gutoza abana imikino.

Umuhango wo guha inyemezabumenyi abo batoza wabereye mu kigo cy’amashuri cyo mu Murenge wa Mushenyi.

Hitimana Innocent umukozi  w’umushinga Right To Play mu Bugesera avuga ko abatoza bahawe inyemezabumenyi ari abitwaye neza muri gahunda bise  “Red ball Child Play”, nyuma yo huhabwa amahugurwa yo gutoza abana ibijyanye n’imikino.

Yagize ati “abo batoza bashyize mu bikorwa gahunda igamije guteza imbere umwana mu mibanire ye n’abandi mu ngororangingo no mu kwimakaza umuco w’amahoro, mu kugira ubumenyi buhagije ku isuku muri we n’aho atuye binyuze mu mikino na siporo”.

Umwe mubongerewe ubumenyi Gashema  Marcel  wigisha muri GS Biharagu mu Murenge wa Kamabuye avuga ko impamvu yahawe inyemezabumenyi ari uko yubahirije ibyo yasabwe gutoza abana. Yavuze ko bimwe mu byo yigishije abana ari ukwirinda icyorezo cya Sida binyuze muri siporo.

Dyna Mutamba umuyobozi mushya wa Right to Play ishami ryo mu Bugesera avuga  ko agiye gukomereza aho abandi batangiriye, gukorana n’abatoza atibagiwe n’abayobozi b’ibigo by’amashuri. Mutamba yavuze ko mu Bugesera hari abatoza benshi, ariko batanga inyemezabumenyi bakurikije uwitaye ku bakinnyi kuruta abandi.