Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Wari umukino ushimishije kandi witabiriwe n’abantu batari bake cyane

tariki 10 Kamena 2012, ku kibuga cy’umupira w’amaguru cy’umurenge wa Rubengera habereye umukino wahuje ikipe ya Ruburikinya ya Rubengera mu karere ka Karongi n’ikipe ya 11 du Midi yo mu karere ka Muhanga umukino urangira Ruburikinya itsinze ibitego 3-1.

Twakinnye n’abasore kandi dukuze ni yo mpamvu twatsinzwe 3-1. Ndaruhutse Richard umutoza wa 11 du Midi

Wari umukino wo mu rwego rwo kurwanya ubusaza no guteza imbere siporo ariko umutoza wa 11 du Midi Ndaruhutse Richard ntiyishimiye kuba ikipe ye yaratsinzwe na Ruburikinya 3-1: “Ikihutirwa ntago ari intsinzi, kuko twebwe twari twaje gukina umukino wo kugorora ingingo no guteza imbere siporo y’abantu bakuze, ariko Ruburikinya yakinishije abasore kuburyo harimo n’abatagejeje ku myaka 30 ndetse banasanzwe bakina mu makipe akomeye, urugero nka Sugira wakinaga muri ba rutahizamu asanzwe akinira AS Muhanga”.

Kapiteni wa Ruburikinya Baziruwiha Abu Bakar we ntiyemeranya n’umutoza wa 11 du Midi. Avuga ko impamvu yabateye gukinisha abasore ari uko nabo babonye muri 11 du Midi harimo abasore: “Urugero ntanga ni nk’uriya wakinaga mu izamu. Ni umwana ukiri muto kandi turabizi ko akina mu izamu rya Flash FC.”

Kugira ngo hatazongera kubaho ubwumvikane buke mu mikino yo guteza imbere siporo y’abakuze, amakipe yombi yemeje ko ubutaha mbere yo gukina bazajya bareba amarangamuntu y’abakinnyi, uwo basanze atagejeje kuri 35 bakamukuramo kubera ko intego atari intsinzi ahubwo ari ukugorora ingingo. Nubwo ariko habayeho kutavuga rumwe kuri uyu mukino wa Ruburikinya na 11 du Midi, wari umukino ushimishije kandi waranzwe na tekinike cyane cyane ku ruhanda rwa 11 du Midi. Nubwo benshi mu bakinnyi barengeje imyaka 35 wasangaga harimo abazi kugenzura ruhago kuburyo utabatandukanya n’abasanzwe bakina mu makipe yabigize umwuga.

Wari n’umukino wo kwifatanya n’umuyobozi w’icyubahiro w’ikipe ya 11 du Midi Mukimbiri Francois warumaze iminsi apfushije umwana, hanyuma ikipe ye yiyemeza gukina umukino ku munsi wo gukura ikiriyo.