Shampiyona y’icyiciro cya mbere mu mupira w’amaguru w’abagore ikomeje kurumbukamo ibitego byinshi, nyuma y’aho The Winners inyagiriye Urumuri ibitego 14 ku busa mu mukino w’umunsi wa 9 wa shampiyona wabereye ku kibuga cya Utexirwa tariki 29/4/2012.
The Winners; ikipe nshya mu cyiciro cya mbere, yagaragaje imbaraga cyane kurusha ikipe y’akarere ka Nyarugenge Urumuri kugeza ubwo iyitsinda ibitego 14 ku busa.
AS Kigali ishaka kongera gutwara igikombe cya shampiyona uyu mwaka, tariki 29/4/2012 yashimangiye  umwanya wayo wa mbere, nyuma yo gutsinda Rambura ibitego 4 ku busa mu mukino wabereye kuri Stade ya Kigali I Nyamirambo.
Mukeba wayo APR WFC nayo yabonye instinzi iremereye, ubwo yari yagiye gusura Bugesera ku kibuga cyayo cya Kamabuye maze ikayihanyagirira ibitego 6 ku busa.
Mu yindi mikino yabaye, Inyemera zatsinze Imirasire mu mukino wabereye I Ngoma, Les Liones itsinda Ecole Secondaire Matunda (ESIR) igitego kimwe ku busa, mu gihe Remera Rukoma yo yari yaruhutse.
Nyuma y’umunsi wa 9 wa shampiyona, ASKigaliiracyari ku isonga n’amanota 24, ikurikiwe na Remera Rukoma ifite amanota 18 naho APR WFC ikaza ku mwanya wa gatatu n’amanota 17. Inyemera iri ku mwanya wa kane n’amanota 16, naho The Winners ikaza ku mwanya wa gatanu n’amanota 15.
Ku myanya ibiri ya nyuma hari Rambura iri ku mwanya wa 10 n’amanota 2, naho ku mwanya wa 11 ari nawo wa nyuma hakaza Urumuri rwa Nyarugenge n’inota rimwe gusa.

 

Share Button