Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Mu Karere ka Karongi, imyidagaduro irangwa ahanini n’imikino (football, basketball, na volleyball) iboneka cyane cyane mu rubyiruko rwo mu mirenge n’urwo mu mashuri. Nubwo ariko iyo mikino yose iboneka mu Karere ka Karongi, haracyari ikibazo cy’uko akarere katagira stade ikinirwaho umupira w’amaguru. Ahoze ari Stade Gatwaro yari iherereye mu Murenge wa Bwishyura nayo ikaba yarasenywe kugira ngo hagurirwe ibitaro bikuru bya Kibuye. Usibye na stade ariko, nta n’ikipe y’umupira w’amaguru akarere kagira nyuma y’aho iyahoze yitwa Kibuye FC isenyutse (2010).

Ifoto Umugi wa Kibuye

Nubwo ariko nta stade nini akarere ka Karongi gafite, buri murenge ufite nibura ikibuga kimwe cy’imyidagaduro, ibyo bigatuma mu mirenge hakunda kuba imikino ihuza cyane cyane urubyiruko cyane cyane muri week end.

Amarushanwa yo koga mu Kiyaga cya Kivu, gusiganwa ku maguru no ku magare nabyo biri mu bijya bisusurutsa abaturage ba Karongi, nubwo hagikenewe ingufu mu guteza imbere imyidagaduro nk’uko bitangazwa n’ubuyobozi bw’Akarere ka Karongi.

Nk’uko kandi bigaragara ku rubuga rwa interineti rw’akarere ka Karongi http://www.karongi.gov.rw, mu gihe cya vuba, akarere karateganya kubaka stade nshya yo mu rwego rwo hejuru izubakwa mu Murenge wa Rubengera.

Ku bijyanye n’imyidagaduro ishingiye kuri muzika, muri Karongi ntiratera imbere cyane. Kugeza ubu kuri Hotel Golf Eden Rock ni ho honyine hari inzu babyiniramo muri wikendi, ariko hirya no hino mu tubari usangamo imiziki cyane cyane iya kera bakunze kwita Karahanyuze (harimo inyarwanda na rumba) zikundwa cyane n’abakunzi ba byeri, kuko ahanini usanga ari abantu bakuze, baba bibuka ibihe byiza byaranze amateka yabo n’ubwo n’urubyiruko narwa iyo rubashije gufata umwanya usanga rugera aho narwo rukayoboka uwo muziki wakahanyujije.