Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Tariki 30 Mutarama 2012 ubwo hasozwaga ukwezi kwahariwe imiyoborere myiza ku rwego rw’akarere ka Nyanza ikipe y’umurenge wa Busasamana yihanije iy’umurenge wa Muyira muri aka karere iyitsinda kimwe ku busa.

 Igice cya mbere cy’uwo mukino cyarangiye amakipe yombi ari ubusa ku busa. Mu gice cya kabiri cy’uwo mukino ibintu byabaye ibindi maze ikipe y’umurenge wa Busasamana iboneza mu izamu igitego kijyamo.

Iki gice byagaragaraga ko amakipe yombi atoroheranye ariko cyarangiye ikipe y’umurenge wa Muyira itabashije kucyishyura n’uko iba itsinzwe ityo.

Mu bihembo ayo makipe yahawe harimo ibihumbi 50 byahawe ikipe y’umurenge wa Busasamana n’ibihumbi 30 by’amafaranga y’u Rwanda yahawe ikipe y’umurenge wa Muyira.

Igikombe cy’imiyoborere myiza cyegukanwe n’ikipe y’umurenge wa Busasamana mu karere ka Nyanza

Nkurikiyumukiza Jean Marie Vianney ushinzwe imiyoborere myiza mu karere ka Nyanza yavuze ko uwo mukino wateguwe mu rwego rwo gusoza ukwezi kwahariwe imiyoborere myiza abantu basabana baseka mu rwego rwo kwishimira ibyagezweho hagati y’abayobozi n’abayoborwa.

 Yabisobanuye atya: Umupira w’amaguru uhuza abantu benshi nicyo gituma wateguwe kugira ngo abantu babone icyabahuriza hamwe kandi ari benshi”.

 Yagarutse ku byakozwe mu karere ka Nyanza muri gahunda y’ukwezi kw’imiyoborere myiza yatangiye kuva tariki 5 /11/2011 kugeza 30/01/2012 avuga ko yabayemo ibikorwa byinshi bitandukanye kandi byishimiwe n’impande zombi ari abayoborwa cyangwa abayobora.

 Mu byakozwe harimo gukemura ibibazo by’abaturage bikorewe mu nzego z’ibanze zegereye abaturage hamwe n’amarushanwa mu mivugo, indirimbo, imbyino no gusiganwa abantu biruka,

 Akarere ka Nyanza niko gaserukiye utundi turere tw’Intara y’Amajyepfo maze itorero Utunyange two mu Ngoro y’umwami Mutara III Rudahigwa mu Rukali ryegukana umwanya wa kabiri mu marushanwa y’imbyino yabaye ku rwego rw’igihugu.  

Uwo mukino wabereye ku kibuga cy’umupira w’amaguru kiri ahitwa i Gihisi mu karere ka Nyanza ahari abaturage b’imirenge yombi basaga 500 bari baje gushyigikira amakipe yabo.