Sitting volleyball: Imikino nyafurika y’i Kigali yitabiriwe n’amakipe atanu.
Guhera ku itariki ya 24 Ugushyingo mu Rwanda hatangiye imikino nyafurika ya Volleyball y’abamugaye bakina bicaye ‘sitting volleyball’. Iyi mikino yitabiriwe n’amakipe y’ibihugu atanu, mu gihe hari hategerejwe amakipe umunani.
Iyi mikino igomba kuzarangira ku cyumweru tariki 27 Ugushingo, yagombaga kwitabirwa na Cameroon, Nigeria na Zambi ariko ngo ibibazo by’ubukungu byababujije kuza nk’uko twabitanagarijwe na Bizimana Dominique, umuyobozi w’ishyirahamwe ry’imikino y’abamugaye mu Rwanda akaba n’umukinnyi wa sitting volleyball.
Bizimana yatubwiye ko iri rushwanwa rizitabirwa n’amakipe atanu, Repubulika Iharanira Demokarasi ya Congo ikaba ari yo kipe yaje ku munota wa nyuma ikaba yaje ihasanga u Burundi, Kenya, Uganda n’u Rwanda rwakiriye iyi mikino.
Iyi mikino ubusanzwe ihuza amakipe y’ibihugu byo munsi y’ubutayu bwa Sahara. Uretse kuba amakipe azaba ahatanira igikombe n’ibindi bihembo, azaba anashakisha itike yo kuzitabira imikino Olympique izabera i Londres mu Bwongereza umwaka utaha. Ikipe izaba iya mbere muri aya marushwanwa izahita ibona iyo tike bidasubirwaho.
Ku ikibitiro kuri uyu wa kane, u Rwanda rurakina na Uganda, naho u Burundi bukine na Kenya.
Umutoza w’ikipe y’igihugu y’u Rwanda, Peter Karreman, yashyize ahagaragara abakinnyi 12 azitabaza muri iyi mikino izajya ibera muri gymnase y’imikino y’abamugaye i Remera. Abo ni Emile Vuningoma, Dominique Bizimana, CallixteTwagirayezu, Jean Bosco Ngizwenimana, Eric Ngirincuti, Fidele Ntawiha, Fulgence Hagenimana, Jean Baptista Gahamanyi, Jean Baptiste Murema, James Rutikanga, Vincent Tuyisenge na Charles Ntagawa.
Kugeza ubu mu makipe y’u Rwanda yose mu mikino itandukanye hamaze kuboneka amatike abiri gusa, afitwe na Muvunyi Hermas ukina Sitball na Adrien Niyonshuti ukina umukino wo gusiganwa ku magare.
Theoneste Nisingizwe
Sat, Dec 10, 2011
Volley