Umukino-Kinyarwanda, Rwanda Sports, African Football, European Football, Soccer, Rugby, Tennis, Basketball

Muyisenge Maurice,umwe mubitabiriye amarushanwa

Mu mikino yahuje urubyiruko ruturuka mu bihugu bigize umuryango w’ibihugu byo muri Afurika y’iburasirazuba (EAC), akarere ka Nyamasheke kitwaye neza. mu mikino ngororamubiri gusa kazanye imidari igera kuri 17.

Akarere ka nyamasheke kahagarariwe n’abakinnyi 21 muri rusange, abakobwa bakaba aribo bitwaye neza ugereranije na basaza babo.

Muyisenge Maurice, umukozi ushinzwe urubyiruko mu karere ka Nyamasheke yadutangarije ko inkumi n’abasore be bazanye imidari ya zahabu icyenda, iy’umuringa ine ndetse n’iya Bronze ine, imidari 16 ikaba yaraturutse mu gusiganwa ku maguru naho umwe w’umuringa waturutse mu gutera ingasire (Disque).

Muri iyi mikino akarere ka Nyamasheke kabaye aka kabiri nyuma y’umugi wa Kigali naho umwanya wa gatatu utwarwa n’ikipe yo mu gihugu cy’ubugande.

Nk’uko Muyisenge yakomeje abivuga ngo uretse imidari bagiye batsindira nta kindi gihembo babonye. Akarere kishingiye abana muri byose ndetse kanabagenera agahimbazamushyi bose uko bitabiriye kangana n’ibihumbi 18 buri umwe gusa ngo abazanye imidari hari agashimwe bongereweho.

Iyi mikino ngo ntabwo yari iteguwe neza kuko wasangaga amakipe yo hanze afashwe neza kurusha ayo mu Rwanda, aho ngo yahabwaga imodoka zo kuyatwara yonyine ndetse n’aho babaga hari hatandukanye. Cyakora nubwo ibyo byabaye Muyisenge avuga ko ngo iyi mikino ni myiza akaba asaba ko yahoraho kandi ikajya ibera mu bihugu bitandukanye.

Aya marushanwa yari agamije gukomeza ubumwe mu batuye ibihugu bigize EAC kandi yanabaye akanya ko gusangizanya ku mico itandukanye kuko nyuma yo gukina abana berekanaga imico y’iwabo. Iyi mikino yateguwe n’umugi wa Kigali yatangiye ku itariki ya 5 igeza kuya 10 ukuboza 2011.