Kuri iki cyumweru mu karere ka Kayonza habereye isiganwa ku magare ry’urubyiruko ruri mu nsi y’imyaka 16. Iri siganwa rikaba ryabaye mu rwego rwo gukangurira abana bo mu mihanda gusubira mu ishuri no kureka ibiyobyabwenge.

 

 

 

 

 

 

Mu karere ka Kayonza hagaragara abana benshi birirwa bacuruza amagi mu tubari, bamwe bakavuga ko babikora mu gihe cy’ibiruhuko gusa, abandi bakavuga ko ariko kazi ka bo ka buri gihe.

Umuyobozi wungirije w’ishyirahamwe ryo gusiganwa ku magare mu karere ka Kayonza, Mbunda Alfred, yavuze ko isiganwa ryo kuri iki cyumweru ritandukanye n’andi masiganwa asanzwe abaho mu gihugu, huko ngo ryari rigamije kwiyegereza abo bana kugira ngo bagirwe inama ku buryo basubira mu mashuri ku bagiye bayacikiriza.

Yagize ati “hari abana benshi ubona ku mihanda, bamwe birirwa bacuruza amagi mu tubari kandi bari ku ishuri. Ibi rero ni ukugira ngo tubiyegereze tubagire inama, bityo bagaruke ku murongo wo gukunda ishuri no kureka ibiyobyabwenge”

Benshi mu bitabiriye iri siganwa bagiye bavuga ko bahisemo ubuzima bwo mu muhanda kubera ubukene bwo mu miryango ya bo, abandi bakabiterwa n’ubwumvikane bucye hagati y’ababyeyi mu miryango ya bo.

Abitabiriye isiganwa bakaba muri rusange barirangije neza kuko mu bakobwa 12 bari muri iri siganwa icumi babashije kurirangiza neza, ndetse n’abahungu 46 barangiza neza kuri 48 bari biyandikishije.

Abana bitabiriye isiganwa bose bahawe amakayi n’amakaramu mu rwego rwo kubakundisha ishuri, ndetse buri wese muri bo anahabwa umwambaro w’abasiganwa ku magare n’icupa batwaramo amazi mu gihe basiganwa.

Mbunda akaba asaba n’utundi turere tw’igihugu ko twajya dutegura igikorwa nk’iki kuko ngo gituma abana bo mu muhanda babona ko hari ababatekereza ndetse bikaba byanatuma bahindura imyitwarire mibi bari bafite.


Share Button